Mombe'u

MBA’EICHAPA OIKO KA’I HA KARAJA

Peteĩ árape ndajeko osẽ mbo’ehára kuéra mitã nguéra ndive oguata. Tapépeje ojuhu pindo hi’ajupáva hína. Mbo’ehára peteĩva he’i mitã nguérape:

-Néike pejupi jahecha, pe’u ha peitýmo oréve.

Ápe ha pépe isarambi, osaingopa hikuái pindo rakãre. Vy’ápe oĩ jave hikuái oguahẽ hendápe kuéra kuñakarai mboriahumi imemby reheve. Ohechávo yva aju ho’usete ha ojerure isýpe. Pya’épeko ojerure isy mitã nguérape jahechápa ndoitýmo peteĩmínte jepe imembýpe. Opuka joa hese hikuái ha he’i:

-Mba'ére piko ho’use ramo ndojupíri ápe ore rojupi haguéicha.

-Mba’éicha piko peipota ojupi ko ha’e michĩva gueteri -ombohovái kuñakaraimi.

-Toñeha’ã... toñeha’ã...

Opuka joa hese hikuái. Mitãmi hasẽ soro ha upeichavérõ jepe ndoitýi chupe yva aju. Mbo’ehára kuéra opuka avei he’i rangue mitã nguérape oity haguã yva mitãmíme. Isy ombyasy eterei ojapóva hikuái imembymíre ha hesay hováre he’i chupe kuéra:

-Mba’éicha tamora’e oiko pendehegui Ka'i ha pene mbo’eharégui Karaja.

Aremi rire oñepyrữ ova ova pindo rakãre hãimbiti joa hikuái yva aju ipópe kuéra. Yvy guive katu Karaja kuéra oñeha’ã ojupívo pindo rakáre.